الرئيسية / الثقافة والفن / “شَجْرَةْ الْخَوْفْ” قصيدة زجلية لعبد الجبار المومني

“شَجْرَةْ الْخَوْفْ” قصيدة زجلية لعبد الجبار المومني

 “شَجْرَةْ الْخَوْفْ” قصيدة زجلية لعبد الجبار المومني

الشاملة بريس: مراسلة/ م.ب

 

 

 

 

*****

قَصَّةْ فَقْدِيمْ الزْمَانْ

نَرْوِي فْنَظْمِي مَعْنَاهَا

شَجْرَةْ مَنْ الرُّوضَةْ

الْغُولَةْ فَغْصَانْهَا تَرْتَاحْ

*****

تَحْرَسْهَا عَيْنْ السَّجَانْ

وْلَا مَنْ يَدُوزْ حْدَاهَا

تَرْهَبْ مَنْ الشُّوفَةْ

التَّمْرَةْ فَغْصَانْهَا تَقْبَاحْ

*****

قْبِيلَةْ تَسْكَنْ لَمْكَانْ

تْسَلَّمْ تَخْافْ بْلَاهَا

تَاكُلْ مَنْ الْغَلَّةْ

تَمْرَةْ ظَنْهَا لَسْرَاحْ

*****

تَاكُلْ تْمَارْهَا قُرْبَانْ

وْقَرْ لَسْيَادْ رْجَاهَا

حَتَى صَارَتْ طَاعَةْ

لَقْبِيلَةْ تَقْصَدْهَا تَرْتَاحْ

*****

مْذَاقْ لتْمَرْفَ الْلسَانْ

رَعْشَةْ خَوْفْ فَقْسَاهَا

الْخَوْفْ طَعْمْ التَّمْرَةْ

خْرَافَةْ صَدْقُوهَا بَصَاحْ

*****

رْضَاعَةْ صَارْ للَصَّبْيَانْ

حَنَّةْ وَبْخُورْ وَدْوَاهَا

وَلِّيتْ خَالَفْ الْعَادَةْ

مَوْجُوعَةْ حَذَّرْهَا الْبَرَّاحْ

*****

الْخَوْفْ سْكَنْ لَبْدَانْ

الْقَلْبْ يَخْفَقْ يَخْشَاهَا

يَتْعَرَّقْ وَالرَّعْشَةْ

رَهْبَةْ عِيشَتْهَا تَقْصَاحْ

*****

وَاحَدْ صْبِي شَجْعَانْ

كَذَّبْ لَقْبِيلَةْ فَلْغَاهَا

قْصَدْ جَذْعْ الشَّجْرَةْ

الْغُولَةْ نَادَاهَا بَصْيَاحْ

*****

عَمْتِي الْغُولَةْ بُهْتَانْ

الْقَصَّةْ جْمَاعَةْ تَرْعَاهَا

الْخَوْفْ مَاشِي تَمْرَةْ

الْخَوْفْ فْقَصَّتْهَا يَسْرَاحْ

*****

سَمْعُوهْ شْيُوخْ لَمْكَانْ

حْدُودْ لَقْبِيلَةْ يَتْخَطَّاهَا

رَبْطُوهْ فَالسَّاحَةْ

مَحْكَمْةْ قَامُوهَاَ الصْبَاحْ

*****

صَلْبُوهْ جُوعُو عَطْشَانْ

يَصْرَخْ بَلْبَاطَلْ رْمَاهَا

مَا شْهَدْ رَجْفَةْ

الْفَرْحَةْ مَا خْفَاهَا وَارْتَاحْ

*****

مَاتْ الصْبِي فَرْحَانْ

فَقْبَرْ دَفْنُوهْ حْدَاهَا

بَعْدْ يَوْمْ الجَمْعَةْ

نَبْتَةْ شَهْدَاتْهَ الَرْيَاحْ

*****

تَكْبَرْ فْقَبْرُ وتْبَانْ

صَارَتْ شَجْرَةْ مَعْلَاهَا

شَجْرَةْ قُدَامْ شَجْرَةْ

الْغَلَّةْ شَافُوهَا تَفَّاحْ

*****

جُوجْ شَجْرَاتْ قْرَانْ

فْسَاحَةْ لَقْبِيلَةْ تَلْقَاهَا

الْخُوفْ بَاقِ قَبْلَةْ

الْحُرِّيَةْ تْمَارْهَا تَقْصَاحْ

*****

الْخَوْفْ يْخَدَّرْ لَوْطَانْ

الْحُرِّيَةْ تَمْرَةْ مَحْلَاهَا

مْرَمَّةْ مَنْ الْحُجَّةْ

مَنْظُومَةْ الْعَلَمِي بِهَا مَدَّاحْ

*****

شاهد أيضاً

لطفي بوشناق يغني للوطن والإنسان والكرامة في مهرجان جرش للثقافة والفنون

لطفي بوشناق يغني للوطن والإنسان والكرامة في مهرجان جرش للثقافة والفنون الشاملة بريس: مراسلة: غازي ...

عبد الغني يحيى الأبارة سيرة الفنان الإنسان 30 عاماً في خدمة الترا ث وفن الخط العربي والتسامح والسلام في العالم . 1988م – 2018 م .

عبد الغني يحيى الأبارة سيرة الفنان الإنسان 30 عاماً في خدمة الترا ث وفن الخط ...

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *